Arzuxan Əlizadə: «Müzakirələrin davamlı keçirilməsi Azərbaycan-ABŞ münasibətlərinin aydınlanmasında müəyyən rol oynaya bilər»

«O cümlədən, digər məsələlər var ki, bunlar öz həllini tapmalıdır»

Milli Məclisdə «Azərbaycan-ABŞ münasibətləri: insan hüquqları, enerji və təhlükəsizlik məsələləri kontekstində» mövzusunda dinləmələr keçirilib. Dinləmələrdə ölkədə insan haqlarının durumu və digər məsələlər müzakirə olunub.

Komitə sədrləri, millət vəkilləri, partiya sədrləri, QHT nümayəndələri, ekspertlərin qatıldığı müzakirələrdə Azərbaycanın Birləşmiş Ştatlardan strateji tərəfdaş kimi gözləntilərinin olduğu vurğulanıb. İlk növbədə, Minsk Qrupunun həmsədr dövləti kimi, Dağlıq Qarabağla bağlı, daha sonra isə Azərbaycanda sabitlik, təhlükəsizliklə bağlı, ikili standartların aradan qaldırılması üçün əməli fəaliyyət görülməsi istənib. Bəzi millət vəkilləri iki dövlət arasında münasibətlərin bəyanatlarla deyil, dialoq yolu ilə həllinin tərəfdarı olduğunu söyləyib. ABŞ-ın son günlər Azərbaycana qarşı sərgilədiyi bəzi mövqeləri əsas gətirərək, Qərbi sərt tənqid edənlər də olub. Eyni zamanda, qeyd olunub ki, insan haqları ümumbəşəri bir məsələ olduğu üçün onu dövlətlərə qarşı bir təzyiq vasitəsi kimi istifadə etmək doğru deyil. Belə məsələləri bəyanatla deyil, dialoqla həll etmək daha məqsədəuyğundur. Müzakirələr zamanı məlum olub ki, ABŞ qondarma «Dağlıq Qarabağ Respublikası»na Azərbaycandan üç dəfə çox yardım edib. Bu yaxınlarda ABŞ-da irqçilik əleyhinə yürüşlər keçirilərkən Barak Obama deyib ki, bu, bir mentalitet məsələsidir. Maraqlıdır ki, başqa ölkələrə gəldikdə isə mentalitet nəzərə alınmır.

Bütün hallarda, sözügedən kontekstdə dinləmələrin keçirilməsi Azərbaycan-ABŞ münasibətlərinin saflaşmasında, durulanmasında və digər bu kimi məsələlərdə nə kimi rol oynaya bilər?

Məsələyə münasibət bildirən AMİP-in baş katibi Arzuxan Əlizadənin sözlərinə görə, bu kimi müzakirələrin keçirilməsi münasibətlərdə yaranan bəzi problemlərin aradan qaldırılmasında müəyyən rol oynaya bilər: «Bu o zaman mümkün ola bilər ki, sözügedən müzakirələr davamlı xarakter daşısın. Yəni epizodik məna kəsb etməsin. Müzakirələr dialoq formasında olsa, hesab edirəm ki, daha effektli ola bilər. Həmin müzakirələrdə ABŞ-ı təmsil edən tərəflər, eyni zamanda ölkənin aparıcı partiya və QHT təmsilçiləri iştirak etməlidir. Hesab edirəm ki, sözügedən format üzrə müzakirələrin davamlı keçirilməsi Azərbaycan-ABŞ münasibətlərinin aydınlanmasında müəyyən rol oynaya bilər. Məsələ ondadır ki, Birləşmiş Ştatlar dünyanın aparıcı dövlətidir. Siyasi-iqtisadi və hərbi gücünə görə dünyada ən güclü dövlətdir. 1994-cü ildə «Əsrin kontraktı»nın imzalanmasında və ondan sonra Azərbaycanın enerji sektoruna sərmayə axınının təmin olunmasında bu ölkənin xüsusi rolu olub. Ancaq o da heç kəsə sirr deyil ki, Dağlıq Qarabağ münaqişəsinin tənzimlənməsində rəsmi Vaşinqton arzuolunan səviyyədə dəstək vermir. Halbuki, ABŞ istəsə bunu edə bilər. Hələ də «907-ci Düzəliş» birdəfəlik aradan qalxmayıb. O cümlədən, digər məsələlər var ki, bunlar öz həllini tapmalıdır».