«Bütün mümkün hüquqi variantlardan sona qədər maksimum səmərəli istifadə etməyə çalışmalıyıq»

Xəbər verildiyi kimi, Beynəlxalq Ədalət Məhkəməsi qərar verib ki, Xorvatiya Yuqoslaviyadan ayrıldığı zaman baş verən müharibədə Xorvatiya və Serbiya arasında soyqırım halları olmayıb. Xorvatiya hökuməti iddia etmişdi ki, Serbiya 1991-ci ildə Vukovar şəhərində və başqa yerlərdə soyqırım həyata keçirib.

Bundan sonra Serbiya da Xorvatiyada yaşayan 200 mindən çox serbin məhv edilməsi barədə əks iddia irəli sürmüşdü.

1991-1995-ci illər ərzində davam etmiş müharibədə Xorvatiya Yuqoslaviyadan ayrıldığı zaman 20000-ə qədər insan həlak olub. Onların əksəriyyəti xorvatlar olub.

Çərşənbə axşamı məhkəmədə çıxış edən hakim Peter Tomka həm Xorvatiyanın iddiasını, həm də Serbiyanın əks iddiasını rədd edib. «Müharibə zamanı hər iki tərəf zorakılığa yol verib»-deyə hakim qeyd edib. Lakin tərəflər «soyqırım aktları üçün zəruri olan konkret niyyət» sübut edə bilməyib.

Xorvatiya BMT-nin əsas məhkəməsi olan BƏM-ə özünün ilk iddiasını 1999-cu ildə təqdim edərək serbləri münaqişə zamanı etnik xorvatları hədəfə almaqda günahlandırıb. Vukovar şəhəri 1991-ci ildə Serbiya tərəfindən işğal olunduğu zaman darmadağın edilib. Xorvatiya, həmçinin, Serbiyadan «insanlara və əmlaka, habelə Xorvatiyanın iqtisadiyyatına və ətraf mühitinə vurduğu ziyana görə» təzminat ödəməsini istəyir.

Bütün bunlar öz yerində. Təbii ki, etnik və dini mənsubiyyətindən asılı olmayaraq, hansı xalq etnik soyqırıma məruz qalıbsa, buna görə günahkar olanlar öz cəzasını almalıdır. Ancaq analoji olaraq Azərbaycan da Xocalı soyqırımı ilə bağlı BMT-nin əsas məhkəməsi olan BƏM-ə müraciət edib, ancaq indiyə qədər bu öz hüquqi qiymətini almayıb. Niyə?

Məsələyə münasibət bildirən AMİP Mərkəzi Şurasının üzvü Əli Orucov bunu bir sıra amillərlə əlaqələndirdi: «Səbəblər müxtəlifdir. Əsasən də Azərbaycana münasibətdə sərgilənən ikili standartlardan qaynaqlanır. Belə ki, 23 ildən çoxdur biz bunu görürük. Məsələ ondadır ki, BMT-nin Təhlükəsizlik Şurasının Dağlıq Qarabağ münaqişəsi ilə bağlı 4 qətnaməsi var. Sözügedən təşkilat həmin qətnamələrin yerinə yetirilməsini təmin edibmi ki, indi də BƏM Xocalı soyqırımı ilə bağlı ədalətli qərar çıxarsın?! Hər şey göz qabağındadır. Yəni bütün bunlar bir-biri ilə bu və ya digər dərəcədə sıx bağlıdır. Azərbaycanın 20 faiz ərazisi işğal altındadır. İndiyə qədər başda BMT və digər beynəlxalq təşkilatlar Ermənistanı konkret olaraq təcavüzkar dövlət kimi göstərməyiblərsə, Beynəlxalq Ədalət Məhkəməsinin Xocalı soyqırımı ilə bağlı müraciətə baxacağını və ədalətli qərar çıxaracağını düşünmək sadəlövhlük olar. Bütün bunlarla yanaşı, hesab edirəm ki, biz özümüz də sözügedən məsələdə aktiv olmalıyıq. Yəni bütün mümkün hüquqi variantlardan sona qədər maksimum səmərəli istifadə etməyə çalışmalıyıq»./Bakı Xəbər/