Bu gün Azərbaycanda Milli Dirçəliş Günü qeyd olunur. Bu günün tarixi 1988-ci ilin 17 noyabrında başlayıb.

1988-ci il noyabrın 17-də Azadlıq meydanına toplaşan yüz minlərlə insan keçmiş sovetlərin Azərbaycana yönəlik ikili standartlara söykənən siyasətinə etiraz edib.

Ermənistanın Azərbaycana qarşı ərazi iddiası irəli sürməsi, Dağlıq Qarabağda yaşayan ermənilərin açıq separatçılıq hərəkatı, bu proseslərin Ermənistan və Dağlıq Qarabağda yaşayan yüz minlərlə azərbaycanlının öz yurd-yuvasından qovulması ilə nəticələnməsi Meydan hərəkatının əsasını qoyub. Moskvanın və o zamankı yerli hakimiyyət orqanlarının siyasəti nəticəsində meydana çıxan bu problemlərin qarşısını almaq təşəbbüsünü üzərinə götürən xalq 1988-ci il noyabrın 17-də Bakının mərkəzi meydanına toplaşaraq fasiləsiz kütləvi etiraz aksiyasına başlayıb. 17 gün aramsız davam edən, milyonlarla insanın qatıldığı bu aksiya həm də keçmiş SSRİ-də ən irimiqyaslı etiraz aksiyası idi. SSRİ-nin süqutu prosesini araşdıran yerli və xarici tədqiqatçıların böyük əksəriyyəti bu prosesdə Azərbaycanda başlayan prosesin mühüm rol oynadığını qeyd edirlər. Dekabrın 4-dən 5-nə keçən gecə ümumxalq mitinqi sovet qoşunları tərəfindən dağıdılsa da, bu, Azərbaycanın müstəqilliyinin bərpasında mühüm mərhələ kimi tarixə həkk olunub. Bu günü tarix kimi yaradan və əlamətdar tarixi bir günə çevirən hərəkat liderləri ilə xalqın vəhdəti oldu.

Bu liderlər xalqın həmişə önündə oldular, heç nədən çəkinmədilər. O dövrü yaşayan insanlar yaxşı xatırlayarlar ki, aramsız davam edən mitinqlərdə insanlar təkcə etiraz üçün deyil,, əslində ən vacib ehtiyacları üçün, onlara hava-su qədər lazım olan Azadlıqlarını və Müstəqilliklərini əldə etmək üçün gəlmişdilər. Hətta, bu məfhumlar onlar üçün sudan, yeyəcəkdən belə önəmli idi. Həmin dövürdə milyonlarla insan Etibar Məmmədovu dinləmədn, onun çıxışını eşitmədən dağılmırdılar. Bu çıxış sanki hər dəfə bütün çıxışların, eləcə də izdihamlı mitinqlərin möhür bəndi olurdu.

Milli Dirçəliş Günü Azərbaycanda dövlət səviyyəsində qeyd olunsa da, 2006-cı ilin dekabrında qanunvericiliyə edilmiş müvafiq dəyişikliklərə əsasən iş günü sayılır.