Sumqayıt Dövlət Universiteti daha bir uğura imza atdı. Beləki, rektor Elxan Hüseynovun dəstəyilə tələbə təşəbbüsünə dayanaraq yaradılan "Ritorika Klubu"nun açılış mərasimi çoxsaylı tələbələrin iştirakı ilə müşaiət olundu. Tədbirdə İdarə Heyətinin üzvləri çıxış edərək dəvət olunan tələbələri Ritorika Klubun fəaliyyət sahələri ilə yaxından tanış etdilər.
Universitet nəzdində yaradılan bu klub 12 sahə üzrə fəaliyyət göstərəcək: Layihələr Departamenti, Filosoflar Federasiyası, Fiziklər Cəmiyyəti, Rəngli İdealar Akademiyası (CİA), Yazıçılar Birliyi, Həvəskar Jurnalistlər İttifaqı, Biznes Klub, Mədəniyyət və İncəsənət Akademiyası, Politoloqlar Universiteti, Tarixçilər Klubu və Qladiator Debatları aiddir. Klub rəhbərliyindən verilən məlumata görə Sumqayıt Dövlət Universiteti Qladiator Debatlarının (QD) təmsil olunduğu ilk universitetdir. QD rəhbərliyinin bu əməkdaşlığa razılıq verməsi hər iki tərəfdən gənclərimizin fərdi inkişafına istiqamətlənib. Xatırladaq ki, Qladiator Debatları gənclərin araşdırmaçılıq, natiqlik, təqdimat, kritik düşüncə kimi bacarıqlarını inkişaf etdirmək məqsədilə yaradılmış ilk Azərbaycan debat formatıdır. Qladiator Debatları 2012-ci ildən yaradılıb və 2013-cü ildən etibarən davamlı olaraq layihələr həyata keçirir. SDU-nun bu yeni tərz intellektual oyuna ev sahibliyi etməsi rəhbərlik tərəfindən təqdirəlayiq qarşılanıb.
Beləliklə, Sumqayıt Dövlət Universiteti bununla bir deyil, bir neçə uğura imza atmış oldu. Tələbələrin asudə vaxtının dəyərləndirilməsinə yönəldilmiş bu fəaliyyət sahələri onların yalnız tələbəlik illərinin məhsuldar olmasına deyil, sonrakı həyatlarında da uğurlu karyeraya sahib olmalarına bilavasitə kömək etmiş olacaq. Tədbirdə klubun yaradılmasında əməyi keçən təşəbbüskar tələbələr Arzu Nəbizadə, Nurlan Səmədli, Pərvin Qocayeva, Bəhruz Bayramov və Elvin Gülməmmədov öz çıxışları ilə klubun yeni üzvlərinə fəaliyyət planları haqqında məlumat verdilər. Ritorika Klubun təlimçi bazasının yaradılmasında dəstəyi olan Best Friends Təhsil və Karyera Mərkəzinin, Universal Təhsil və Karyera Mərkəzinin, İnnovativ İnkişaf Mərkəzinin adı xüsusi vurğulandı. İlk təlim isə Best Friends Təhsil və Kariyera mərkəzinin təşkilatçılığı ilə Elvin Dadaşovun təqdimatında keçirildi. İştirak edən hər bir tələbə tanıtım seminarı və təlimdən məmnunluq duyduqlarını qeyd edərək, Sumqayıt Dövlət Universitetinin rəhbərliyinə, rektor Elxan Hüseynova və Humanitar məsələlər üzrə prorektor Nizami Namazova təşəkkür etdiklərini bildirdilər.
