Rusiya prezidentinin mətbuat katibi Dmitri Peskov Kremlin Moldova parlamentində Belarus müxalifətini dəstəkləmək məqsədilə qrup yaradılması ilə bağlı məlumatının olmadığını bildirib.

Millet.az xəbər verir ki, Peskov jurnalistlərə açıqlamasında məsələ barədə heç nə bilmədiyini deyib.

“Biz bu barədə heç nə bilmirik. Düzünü desəm, mən bu barədə heç vaxt eşitməmişəm”, – deyə Kremlin sözçüsü bildirib.

Qeyd edək ki, Moldovanın keçmiş prezidenti İqor Dodon Moldova Prezidenti Maya Sandunun və hakim Fəaliyyət və Həmrəylik Partiyasının Belarus prezidentliyinə keçmiş namizəd Svetlana Tixanovskayanı dəstəkləyən parlament qrupu yaratdığını iddia edib.

Dodonun sözlərinə görə, qrupun yaradılmasında məqsəd Belarus Prezidenti Aleksandr Lukaşenkonun hakimiyyətdən uzaqlaşdırılmasına dəstək verməkdir.

Siyasətçi bu təşəbbüsün amerikalı milyarder Corc Sorosun göstərişi ilə həyata keçirildiyini də iddia edib. Sözügedən iddiaların müstəqil şəkildə təsdiqləndiyi barədə məlumat təqdim edilməyib.