"Haçansa münaqişə bölgəsinə sülhməramlı qüvvə yerləşdiriləcəksə, yaxşı olar ki, bu, BMT mandatı altında olsun"

Arzuxan Əlizadə: "Görünür, Rusiya bunu KTMT vasitəsilə reallaşdırmaq istəyir"

Kollektiv Təhlükəsizlik Müqaviləsi Təşkilatının Kollektiv Sülhməramlı Qüvvələri dünyanın "qaynar nöqtə"lərində mümkün sülhməramlı əməliyyatlara hazır olmalıdır. Bunu Rusiya mətbuatına açıqlamasında KTMT-in baş katibi Nikolay Bordyuja deyib:

"Vəziyyət hazırda bütün istiqamətlərdə gərginləşib. Və artıq bu gün aydın görünür ki, hazırda dünyada olan bir çox "qaynar nöqtələr"ə sülhməramlı qüvvələr cəlb edilməlidir. Məhz buna görə KTMT Kollektiv Sülhməramlı Qüvvələri tərəfindən praktiki döyüş tapşırıqlarının yerinə yetirilməsi mümkün əməliyyatlara hazırlıqdır. Düşünmürəm ki, onlar yaxın gələcəkdə baş tutacaq, lakin, istənilən halda, KTMT sülhməramlı qüvvələrin tətbiq edilməsinə hazır olmalıdır".

Qeyd edək ki, Nikolay Bordyuja Ermənistanda "Marşal Baqramyan" poliqonunda sentyabrın 30-dan davam edən KTMT sülhməramlı qüvvələrinin "Sarsılmaz qardaşlıq-2015" təlimlərini izləyir. KTMT Kollektiv Sülhməramlı Qüvvələri təlim zamanı Qafqaz regionunda sülhün təmin edilməsi üzrə şərti əməliyyatlar keçirir.

Qeyd edək ki, "Sarsılmaz qardaşlıq-2015" təlimlərində Ermənistan, Belarus, Qazaxıstan, Qırğızıstan, Rusiya və Tacikistanın Silahlı Qüvvələrinin və xüsusi təyinatlı polis dəstələrinin 600-dək üzvü, həmçinin, 50 ədəd döyüş və xüsusi texnika, 4 helikopter və ərazinin kəşfiyyatı üçün pilotsuz təyyarələr iştirak edir.

KTMT-nin baş katibinin belə açıqlama ilə çıxış etməsi təsadüfi ola bilməz. Ola bilər ki, bununla Bordyuja nəyəsə eyham vurub. Bu baxımdan güman etmək olarmı ki, Bordyuja Dağlıq Qarabağda mümkün sülhyaratma əməliyyatlarını nəzərdə tutub?

Məsələyə münasibət bildirən AMİP-in baş katibi Arzuxan Əlizadənin sözlərinə görə, N.Bordyuja bununla Dağlıq Qarabağı da, digər münaqişəli əraziləri də nəzərdə tuta bilər: "Ancaq o da sirr deyil ki, Rusiya Dağlıq Qarabağa öz qoşunlarını sülhyaratma adı ilə yerləşdirməkdə maraqlıdır. Əslində bu fikir yeni deyil və çoxdandır Kremlin belə bir istəyi var. Sadəcə, müxtəlif səbəblərdən Rusiya bunu reallaşdıra bilmir. Görünür, Rusiya bunu KTMT vasitəsilə reallaşdırmaq istəyir. Zatən məlum məsələdir ki, KTMT-də əsas aparıcı güc Rusiyadır. Digər dövlətlər əsasən bu ölkənin yedəyində gedir. Haçansa münaqişə bölgəsinə sülhmərəmlı qüvvə yerləşdiriləcəksə, yaxşı olar ki, bu, BMT mandatı altında olsun. Sülhməramlı qüvvələrin KTMT hərbi qüvvələrindən ibarət olması arzuedilən deyil. Bu daha çox o anlama gəlir ki, Rusiya hegemonluq edəcək. Bu da yolverilməzdir. Ən azından ona görə ki, ortada Abxaziya təcrübəsi var. Belə ki, sülhməramlı adı ilə yerləşdirilən qüvvələr çox keçmədi separatçıların tərəfində durdular.

Hesab edirəm ki, Azərbaycan bütün bunların fərqində olduğu üçün daha düşünülmüş və ehtiyatlı siyasət yeridir. Bu da ölkənin müstəqil siyasət yeritməsindən qaynaqlanır. Düşünürəm ki, bu kimi məsələlərdə daha diqqətli olmaq lazımdır".

Vidadi ORDAHALLI